اخصائية التغذية (ناجحة ، فاشلة ، نص ونص)

مع احترامي لكل الناس

بس عندي حاجة من زمان نفسي اقولها

اخصائيات التغذية يختلفوا مافي وحدة زي التانية اللي فاهمه.. واللي (كسولة)

كسولة يعني مالها خلق كلش .. هي شاطرة بس مافيها تسوي شي

في نظري كولنا ناجحين مافي احد فاشل بس في ناس تحب تجلس في نقطة معينة ودا تعريف اخر للفشششل

في نظري \رأيي \ ملكي انا \ حقي \ محد له صلاح (فاهمين يعني من وجهة نظري مو شي رسمي )

---

اخصائية التغذية الناجحة :

على طول تبان من كلامها مع المريض هي اللي تقول (كُل) وما تقول لا تاكل وتدي خيارات اكل للمريض يعني حتى المريض ما يلحق يسألها لانو بتقول كل شي وحتى المريض ماراح ينسى كلامها

(لازم تكون امينة)

---

اخصائية التغذية ام نص ونص :

هي اللي تدخل وتقول كل المعلومات اللي عندها وتضحك وكل شي بس ما تحب احد يسألها في نظرها انو هي ما تعرف شي ؟؟ كتيير اشوف زي كدا ما يحبو دكتور يسألهم او اي احد يسألها مع انو معلوماتها صحيحة وكل شي بس مدري ليش هما كدا ؟؟!! ودا اكتر صنف ينرفزني يعني عادي لمن احد يسألك عن شي وتقولي ما اعرف مررة عادي

(لازم تكون امينة)

(انا تلات ارباع الاسئلة اللي تجيني على الاسك والانستغرام اقول ما اعرف وعادي ماشية الحياة)

(بس انتبهوا مو تقولوا ما اعرف وتطنشوا المعلومة لاااا روحوا ابحثوا عنها ..... ترا من دي النقطة انتو حتتعلموا) لانو لمن الشخص يسألكم تحسوا بالإحراج انكم ما تعرفوا وتستحوا على وجهكم وتروحوا تبحثوا

---

اخصائية التغذية الفاشلة:

ودا اسوأ الانواع حاولوا ما تكونوا من دي الفئة

دول اللي كلل شوية تقولك (مو شغلي)،(ايش معنى انا)،(غيابها اكتر من جياتها)،(تجي من صباح الله خير تدعي انو مافي حالات عشان ماتشتغل كل يوم تدعي مو مرة ولا مرتين)،(تكتب في الورقة وما تكلم المريض وترا كتيير شوفتهم)،(تدخل للمريض تدي المطوية وبس ما تهرج معاه) ،(ترا اوقات يكونو شطار مرة بس مشكلتهم مالهم خلق كلش ) مدري ليش؟؟

دي ما تترجي منها خير لانو وقفت من ايام ما اتخرجت من الجامعة

الناس ماشيين وهي واقفة !!!!

وكمان ما تحب تساعد احد ؟

(ماعندها امانة واضح لانو مابتكلم المريض)

---

اوقات تلقوا اخصائية ام نص ونص او فاشلة بس تلقوا عندهم امانة اكتر من الاخصائية الناجحة بالنسبة لي الاتنين الاولانيين اكيييييد افضل من الناجحة

(الامانه اهم من كلللللل شي)

يعني مو توقعي في الملف وماتكلمي المريض ترا حرام المريض يحتاج معلوماتك مو محتاج توقيعك الخربوطي

كلمة اخيرة:

ترا مو شرط الناجحة هي اللي تقرا ابحاث او معدلها عالي او او الناجحة هي اللي المريض يستفيد منها لانو احنا في الاول والاخير دراستنا دي كولها عشان نعالج المريض او نساعد الناس

في كتير اخصائيات ما عندهم معلومات بس سبحان الله المرضى يحبوهم لانو اخلاقهم عالية وتريح المريض

ان شاء الله كولنا نكون من الناجحين الامينين

اتمنى لي ولكم التوفيق

افهموها بطريقة ايجابية غير سلبية ... امكن فيها شوية تجريح بس فعلا انقهر من البعض