اللهم إني اسألك علماً نافعا ، ورزقاً طيباً ، وعملاً متقبلاً ( بداية تجربة جديدة في حياتي)
- MARAM FADHEL
- Nov 21, 2015
- 2 min read
اللهم إني اسألك علماً نافعا ، ورزقاً طيباً ، وعملاً متقبلاً
كنت اقرأ دا الدعاء وانا طالبة كل يوم في اذكار الصباح
وكنت بس اهتم بالعلم النافع
الآن ياااارب اسألك جميعها (علم و رزق وعمل)
كيفكم ؟؟
وحشتوني يا من دعمتوني 3> سواء صديقات مهنة او بنات دفعتي او بنات الدفعات اللي بعدي وكمان الناس اللي ما بعرفها
اتمنى تكونوا كلكم بخير وصحة وسلامة
طبعا كملت دي المدونة سنة و ٣ شهور يالطيييييييف الايام كيف تجري (الله يحسن خاتمتنا)
كانت بداية بسيطة مني ما اتوقعت ابدا انو في يوم راح تستمر او احد راح يقرأها
بعد انقطاع دام ٥ شهور تقريباً قررت ارجع في اقرب فرصة
خلال ٥ شهور حصلت معايا احداث جدااا كثيرة
خلصت الامتياز واتوظفت واستقلت وبعدين اتوظفت في عيادة حاليا ولله الحمدلله
طبعا ما احكيكم عن اللخبطيشن تخرج مع وظيفة
يعني اقدر اقولكم اني ما ارتحت بعد التخرج الى الآن !!
بس الحمدلله على التجارب اللي عديت فيها
طبعا انتو كنتو معايا خلال الفترة الزمنية ايام الانتيرن وكنت احط تجاربي والاشياء اللي بتمر علي
وكنتو تشاركوني بآرائكم ومتابعتكم
حالياً : من دا البوست والبوستات الجاية راح تكون عن مرحلة جديدة كليا في حياتي
حتعيشوها بحلوها ومرها معايا
ربنا يخليكم لي
مع انو في ناس منكم ما اعرفهم بس فعلا متأكدة انكم ناس طيبين
فعلا اكتب وانا دمعتي على خدي
قبل فترة كنت طالبة حائرة ضايعة وما اعرف غير القليل في علم التغذية وما زلت
وكنت اقول في داخل نفسي انا لو اتوظفت ما ادري ايش حعمل كنت دايما اقول انو مو مستعدة للوظيفة
كنت اخاف اني اتوظف وفي نفس الوقت ابى اتوظف وما اقعد في البيت
عدم استعدادي او جهوزيتي امكن كان بسبب انو انا انسانة احس دراستي ما كانت كافية اني اتوظف واعالج مرضى
والآن انا موظفة في عيادة في مجمع العيساوي الطبي بالكعكية في مكة المكرمة ولله الحمد والمنة وبرضو بتعلم وفي اشياء كتييييييير ما بعرفها للآن والله يرزقنا العلم النافع
الله يوظف اللي ما توظف ياااااارب
والله يوفق ويعين اللي اتوظفوا ياااارب
والله يوفق اللي لسا ما اتخرجوا ويتخرجوا بأعلى الدرجات ويكونوا فخر لنا
راح تكون المرحلة القادمة من حياتي جميلة بإذن الله ونقطة تحول لي
راح احاول اشارككم بكل اللي اقدر عليه من معلومات وتجارب وخبرات
اتمنى اني اكون خفيفة ظل عليكم
وانا آسفة على التأخير سامحوني فعلا مالقيت وقت اكتب كل الشهور اللي فاتت لاني كنت اجهز للعيادة ومسألة التكيف مع الوظيفة اخدت مني وقت طويل
اي اسئلة بخصوص اي موضوع انا جاهزة
Komentarze