سنة الامتياز (نصيحة من قلب)
- MARAM FADHEL
- Jun 14, 2015
- 4 min read
السلام عليكم و رحمة الله وبركاته
كيفكم صبايا؟
ان شاء الله تكونو كويسين والانتيرن كويس معاكم :)
جاني طلب امكن من ٤ او ٣ بنات من دفعتكم اني اتكلم عن سنة الامتياز بشكل عام
طبعا دا اللي حكتبو راح يكون من قلبي (نصيحة لطول عمركم مو بس سنة الانتيرن)
اولاً
شي حياة المستشفى غييييييييير عن حياة الجامعة والصاحبات
بس تضل في مذاكرة طول حياتك
لحد يقولك سنة الامتياز مافيها دراسة ؟
للأسف الشديد اكيد دا مفهومكم!! حتى احنا كنا زيكم
سنة الامتياز هي سنة تدريبية(يعني تثقفي نفسك تطوري نفسك تذاكري الاشياء اللي ما كنتِ ملحقة عليها ايام الجامعة)
مو سنة اجازة ومافي دراسة وراتب ينزلك؟؟!!
هي من احلى السنوات صراحة سواء لي او غيري وحتكتشفوا دا الشي
راح تغيركم كتيير
راح تنضجوا ويتغير تفكيركم
دا كلو بحكم حياة العمل اللي حتشوفوها
ثانياً
نصيحة عشان تمشوا في سنة الانتيرن تمام لا تسمعوا للناس اللي تقول (سمعت، الدفعة اللي قبلنا،واسطات)
دول الناس اعملولهم اكس x من حياتكم
لانو دول بس يدوكم معلومات غلللللط
في سنة الانتيرن لا تسمعوا للناس اللي تقول
(والله الدايتشن اللي في النور مررة شديدين) او اللي تقول والله الدايتشن دي ما تعلم
او او او او او ...
سيبوكم من كلام الناس ممكن الدايتشن الفلانية كانت شديدة مع صاحبتك لانو حصلت مشكلة بينهم
او ممكن الدايتشن كان عندها ظرف مسكينة وعصبت
او او او او او ....
شيلو كلمت سمعت او يقولوا من قاموسكم
ثالثاً
حتواجهوا مشاكل تافهة في سنة الامتياز
بس احنا كنا نكبر المشكلة عشان فاضيين ماعندنا لا شغلة ولا مشغلة هههههه
يعني مثلا مشكلة مافي غرفة مخصصة لبنات التدريب في بعض المستشفيات ؟
هي صح مشكلة بس ترا مايحوج الواحد يكره المستشفى عشانها
او
يشتكي لدكتور فراس عشانها
او
يتضارب معع الدايتشن عشانها
انظروا لها بنظرة ايجابية
يعني لمن مايكون في غرفة
معناتو الشنط تكون صغيرة
وخفت عليكم الشنط
لا تطالعوا بنظرة سلبية
مثلا زي فين ناكل فين نحط العبايات فين فين فين .....
وبعدين حتى لو انسرقت منك حاجات عادي حطيها في سبيل العلم
وحيعوضك ربنا بحاجات احسن منها
بس بجد انا كنت في مستشفى النور ومافي غرفة ولا عمره اتسرق مني شي
ترا السرقة مو شرط فلوس :)
ممكن بعض الناس يسرقوا معقم !! ليش ما ادري؟
رابعاً
في سنة الامتياز راح تحتاجو
١- دفتر خاص بحالات ومعلومات المستشفى
تكتبوا فيلو كل شي ويوميا ترا دي احسن طريقة كل يوم اكتبي عدد الحالات وايش الحالات يعني بشكل مختصر
وايش اديتهم دايت مثلا او كيف اتعاملت معاهم
٢- دفتر خاص بالمعلومات اللي قرأتي عنها
انا عن نفسي كنت المعلومات اللي اقرأها اكتبها في لابتوبي في ملف وورد وانزلها هنا لانو الدفاتر دايما تضيييع :(
(ممكن تستبدلوا الدفتر بالجوال او الايباد)
خامساً
دي اهم نقطة
ركزوا
لمن تكون الدايتشن عصبية او مشكلجية او اي شخصية انتي ما تحبيها
لا تخلي شخصيتها تمنعك من التعلم ابدا
مالك صلاح بشخصيتها لك بالمعلومة اللي تاخديها منها
مافي شخصية كاملة
واذا على الاخلاق مافي احد فينا اخلاقه كاملة ابدا
ممكن شخصيتها ما تعجبك بس تعجب غيرك
اهم حاجة اتعلمي من الدايتشن لا تخلوا الشخصيات هي اللي تحدد تعليمكم
(دي نصيحة حتى لحياتكم المستقبلية)
اتعاملي مع الناس بأخلاقك مالك صلاح بأخلاقهم
راح تواجهوا دايتشن مزاجيين او بس تهزأ او او ...
مالكم بشخصيتها لكم بالعلم اللي اخذتوا منها
سادساً
دي اخر نقطة وبرضو مرررررررررررررررة مهمة لحياتكم التغذوية المهنية هههه
اصحكم شوفو ازكن عليكم لا تمشوا على معلومة احد او معلومات الجامعة
مو معنى كلامي انو اللي درسناه في الجامعة غلط ..لا ابدا
اللي درسناه في الجامعة بيكون ابحاث حقت وقتها لكن كل يوم بتطلع ابحاث جديدة
مو معقولة تعالجي المريض بمعلومة اخدتيها سنة تانية جامعة ؟؟ ممكن تكون المعلومة ماتت خلاص ههههه وحيموت المريض معاكي !!
(ولا تمشي على معلومة دايتشن حتى لو كانت الدايتشن الاولى على الدفعة او دارسة في هارفارد )
امشي على المعلومات اللي انتي حتبحثيها
كل ما احد قلك معلومة روحي ابحثي واتأكدي منها
مثلاً تجي وحدة دايتشن تقولك مرضى BURN نديهم بروتين 1.5- 2 وتجي انتِ تمشي على كلامها وتجي اللي بعديك تمشي على كلامكم وتكون المعلومة مثلا حقت سنة 2012 واحنا دحين 2015
حتقوليلي طيب ايش اللي حيفرق ؟؟ (الارقام ممكن تكون غلط)
ترا حيفرق كتييير اول شي احنا امكن القسم الوحيد اتوقع اللي لازم نعمل Update كل يوم او كل فترة
ماراح تكوني دايتشن شاطرة ابدا ولا احد حيعتمد عليكي اذا ما كنتِ بتعملي ابديت لمعلوماتك
طيب فلنفرض انك ما تبي تعملي ابديت ومشيتي على كلام الجامعة
ورحتي العناية المركزة وجلست تحلي كيس
واديتي البروتين مثلا 2 جم في الوزن
وجا دكتووووور (لاحظوا دكتور مو دايتشن)
وقلك ليش تدي ٢ المفروض ١.٢ جم دا اخر الابحاث
مين فين جبتي معلومتك يافلانة ؟؟؟!!
وترا تحصصصل كتيييييير
لا تخلوا الدكتور اللي مالو صلاح في قسمنا عامل ابديت اكتر منك
اخر حاجة
نصيحة لا تخلوا سنة الامتياز مجرد سنة تاخدي قلم معاكي المستشفى وتروحي تكتبي في ورق واوقات حتى المريض ماشوفتيه ولا انتي دارية عنو وترجعي البيت تنامي وتصحي افلام ومسلسلات واليوم اللي بعدو نفس الحكاية
العبوا واعملوا ابديت وانبسطوا
ما اقصد ما تتفرجوا افلام او ما تخرجوا من البيت لا عادي العبوا صح مافيها دراسة زي الجامعة وحبسة في البيت
بس اشتغلوا علي نفسكم شويتين
انا عن نفسي (واعوذ بالله من كلمة انا) بس للفائدة
كنت مخصصة ثلاثة ايام في الاسبوع كل يوم ساعتين بس ابحث عن معلومات جديدة واتأكد من معلومات الدايتشن
ترا ساعة في اليوم مررررة قليلة مو شرط كل يوم تبحثي
بس خصصي لك ايام في الاسبوع تكون للبحث
لو قالوا اختاري سنة من سنوات حياتك عشان نوقف الزمن وتعيديها
راح اختار سنة الامتياز بكل تأكيد
تراها سنة جمييييييلة استمتعوا فيها
راح يكون في مواضيع تانية ان شاء الله
واسفة على الكلام الطويل
Opmerkingen