#مواقف_مضحكة_مع_المرضى_في_العيادة
- MARAM FADHEL
- Feb 24, 2016
- 3 min read
دي المرة حاولت اني أكون بعيدة عن المواضيع الجامدة والتعليمية (إن شاء الله يعجبكم)
هو الموضوع كتبته لسببين :
الأول: تغيير عن الروتين
الثاني:بمناسبة تغيير ديزاين الموقع (صار موقع معد هو بلوق)
اتمنى تعطوني آرائكم بخصوص الديزاين الجديد حتى لو ما عجبكم قولولي عشان اغير
للإفادة: المواقف فقط للفرفشة وليس من باب التريقة على المرضى ابداً و كلها حصلت في عيادتي
اول موقف
المريضة: دكتورة سمعت انو بذور الكتان تسبب العقم .. ايش رأيك؟
انا: سألت المريضة عندك بزورة؟
المريضة:ايوا عندي 5 اطفال
انا: طيب خلاص خدي بذور الكتان حتى لو جاكي عقم انتي عندك بزورة
مدري ايش دخلني اسألها واتفلسف؟؟ هههه يعني خلاص امكن هي تبى خلفة كمان
طبعا ما احكيكم عن النظرة اللي اعطتني هي المريضة
تفسيري لنظرتها انو هي معد راح ترجع العيادة .. و طبعا ما رجعت للآن !! والسبب معروف
اوقات سرعة البديهة حلوة بس تنكب هههههههههههههههه
موقف ثاني
من عادتي اي مريض يدخل العيادة انادي بخالة اذا كانت كبيرة في العمر او ابلة اذا كانت صغيرة في العمر يعني من عمر ٢٥ لين ٤٠ ابلة وهكذا (من تناحتي اوقات ما أدقق في الاعمار)
يوم من الايام دخلت علي مريضة بفل ميك اب ؟؟؟ وطويلة وشكلها كبير وصدر وارداف وكل شي ماشاء الله راسمة حواجبها احسن مني هههههههههههه ابدا ما اتوقهت انه عمر المريضة ١٦
انا: قست للمريضة طولها والوزن وخلاص بدأت اشرح الدايت (على فكرة عمر المريضة ١٧سنة او ١٦ لست متذكرة وعلى فكرة كمان استخدمت القروث تشارت) وطول الوقت اقول يا ابلة و يا ابلة !!
المريضة: ساكتة وماسألت ولا سؤال طول فترة شرحي للدايت وفلسفتي
انا: مستمرة في مناداة المريضة بأبلة؟؟
(يارييت انشقت الارض وبلعتني) خلصت كل شي وقولتلها في اي سؤال يا حلوة؟؟
المريضة:دكتورة كم عمرك ؟؟
انا: عمري ٢٣ ليش؟!!
المريضة: ترا انا اصغر منك ماني عارفة ليش تقولي ابلة .. ترا شكلي صغير مو كبير !!
انا: لا حبيتي بس انا متعودة انادي الناس بأبلة
المريضة: لا بس يعني انا صغيرة انتي شكلك اكبر مني
انا: طبعا لازم من لقافتي ما اعرف اسكر فمي هههههه قولتلها والله انتي حاطة ميك اب ما اديتك ١٧ سنة وجلست ارقع قولتلها ماشاء تعرفي تحطي ميك اب (مدري هي ترقيعة ولا تهزيئة)
المهم سمعتو بمثل (جيت اكحلها عميتها يمثلني يومياً)
موقف آخر
انا من الناس اللي عندي ادمان للشوكولاتة بجميييييع انواعها اكلها في اي وقت واي دقيقة ما عندي مشكلة
في عيادتي عندي درج حاطة فيلو اكل (جمييع ما تشتهي النفس من المحرمات والمباحات)ههه
وايضا من عشاق الكتكات والماتيزرز وكنت من زمان اكل حلى عادي قدام المراجعين
كان هدفي من دي الحركة انو افهمهم انو عادي الواحد يخبص بس بعقل
يوم من الايام نزلت النادي (النادي تحت عيادتي)
غالبا اطمن على مراجعيني واستقبل اسئلتهم
قابلت وحدة من مراجعيني سألتني :
المريضة:دكتورة قدي ايش اكل حلى في اليوم؟؟
انا: شوفي حبيبتي الحلى حاولي مو كل يوم مرتبن في الاسبوع او مع الوجبة المفتوحة ، واكمل شوفي انا اخصائية تغذية بس اكل حلى وكل شي بس مو كل يوم اوقات يعني وقت ما اشتهي (كنت لابسة اللابكوت وماخدة وضعية الفلسفة)
المريضة: بس يادكتورة انا كل ما ادخل العيادة عندك القى كيس كتكات على مكتبك ؟؟؟
انا: كان نفسي ينهدم النادي على راسي .. صراحة ما عرفت ايش ارد وسكت وقولتلها ماشاء الله عندك قوة ملاحظة عجيبة هههههههههههههههههههه
راح اطبق فكرة المواقف المضحكة ان شاء الله راح اخصص بوست في كل شهر
ان شاء الله اكون خفيفة دم عليكم
طبعا في مواقف كتييير ولكن ما تحضرني الآن
Comentários